Wiki Loves Monuments -sniimmâmǩeâlbast sniimât rajjum kulttuuräʹrbbvuõđ da vääʹldet ouʹdde jiijjâz snimldõkarkiivi pueʹrmõs snimldõõǥǥid
Maaiʹlm šuurmõs sniimmâmǩeâlbb Wiki Loves Monuments riâššât eʹpet čõhččmannust. Tän eeʹjj teeʹmmen lij piʹštti kulttuuräʹrbbvuõtt. Ǩeâlb riâššât Lääʹddjânnmest da jeeʹres åʹrnn maaiʹlmest 1.–30.9.2022.
Wiki Loves Monuments -ǩiõlbbu vuäitt vuässõõttâd snimldõõǥǥivuiʹm, koin lij suõjjlum põrtt leʹbe muđoi ärvvsiʹžžen meäʹrtum kulttuuräʹrbbvuõttpäiʹǩǩ, kååʹtt lij ǩeâlb kaart âʹlnn. Tän eeʹjj ǩeâlb teeʹmmen lij piʹštti äʹrbbvuõtt, kååʹtt lij Euroopp kulttuurpirrõspeeiʹvi eeʹjj teeʹmmen še.
Koon raajjâlm leʹbe kueʹstelm ton haaʹleʹčiǩ seeilted puõʹtti puõlvvõõǥǥid? Mäʹhtt tõt lij ǩiõrddâm ääiʹj? A kaiʹbbjak-a ton koon-ne pääiʹǩ, kååʹtt lij läppjam?
Vuäitak vuässõõttâd ǩiõlbbu še sniimeeʹl histoorlaž snimldõʹǩǩe paar, kååʹtt čuäʹjat, što måkam snimmum päiʹǩǩ lij ânnʼjõžääiʹj. Äjšmâʹttep vuässõõttâd ǩiõlbbu droonsnimldõõǥǥivuiʹm leʹbe jiijjâz snimldõkarkiiv pueʹrmõs snimldõõǥǥivuiʹm še.
Jeäʹrben ǩiõlbbu tuäivat snimldõõǥǥid nåkam paaiʹǩin, kook lie pâi härvva snimmum. Vueʹlj ooccâd pirrõzstes nåkam põõrtid, rajlmid leʹbe luâttpaaiʹǩid, koid jeärraz jie leäkku hoʹhssjam sniimmâd! Pääiʹǩ, kook jie leäkku ouddâl snimmum, lie miârkkum ǩeâlb kaart ool ruõʹpsses eeuʹnivuiʹm.
Ruõkk ǩiõlbbu vuässõõtti snimldõõǥǥid 1.–30.9.2022 Wikimedia Commonsiin-snimldõkbaʹŋǩǩe, koʹst tõk lie pukid friijâld ââʹnnemnalla. Vuäitak vuässõõttâd ǩiõlbbu jiijjâz snimldõõǥǥivuiʹm, kook lie snimmum eeʹjj 2022 ääiʹj leʹbe ouddâl.
Vääʹld lokku jeäʹrben:
- Droonsniimmʼmõʹšše âlgg leeʹd lååʹpp, muuʹšt väʹldded lokku veʹrǧǧniiʹǩǩi vuäʹppõõzz tõʹst.
- Muuʹšt ââʹnned ciistâst privaatlažvuõđ. Jõs haaʹlääk sniimmâd privatvuuʹdest, ään lååʹv sniimmʼmõʹšše mäddvuäʹmsteeʹjest. Jõs snimldõõǥǥi âʹlnn lie oummu, ään lååʹv seeʹst, što vuäitak õlmstâʹtted snimldõõǥǥ.
Ǩeâlb reäšš Wikimedia Suomi ry. Tõn õhttsažtuâjla lie Euroopp kulttuurpirrõspeeiʹv, Hyvinkää gååradmuʹzei, Kerava muʹzeikääzzkõõzz, Muʹzeikonttar, Nurmijärvi muʹzei, Lapua gåårad muʹzei, Riihimäki gååradmuʹzei da Tuusula muʹzei. Ǩeâlb riâššât Lääʹddjânnmest juʹn kuuđad vuâra. Täävtõssân lij älšsmâʹtted mieʹldd nuʹtt määŋgas go vueiʹtlvaž da raajjâd kulttuuräʹrbbvuõđ kuâsttjeeʹjen da tobddsen.
