Wiki Loves Monuments -čuovgagovvagilvvus govvejit huksejuvvon kulturárbi ja buktet oidnosii iežaset govvaarkiivvaid ártnaid
Máilmmi stuorimus čuovgagovvengilvu Wiki Loves Monuments lágiduvvo fas čakčamánus. Dán jagi temán lea suvdilis kulturárbi. Gilvu lágiduvvo Suomas ja iešguđetge guovllus máilmmis 1.–30.9.2022.
Wiki Loves Monuments -gilvui sáhttá oassálastit čuovgagovaiguin, main oidno suodjaluvvon visti dahje muđui dehálažžan árvvoštallojuvvon kulturárbečuozáhat, mii gávdno gilvvu kárttás. Dán jagi gilvvu temán lea suvdilis árbi, mii lea maiddái Eurohpá kulturbirasbeivviid jahketemá.
Man vistti dahje oidnosa don háliidivččet seailluhit boahttevaš buolvvaide? Mo dat lea gierdan áiggi? Naba áibbašatgo muhtin báikki, mii lea juo láhppon?
Sáhtát oassálastit maiddái govvemiin historjjálaš govvii pára, mii muitala, makkár govvenbáiki lea oaidnit dáid áiggiid. Mii movttiidahttit sáddet maiddai dronagovaid dahje ovdal govvejuvvon iežat arkiivvaid ártnaid.
Gilvui sávvat erenoamážit govaid dakkár čuozáhagain, mat leat govvejuvvon unnán. Vuolggesmat de dutkanmátkái iežat birrasii ja oza báikkiid, visttiid dahje luonddučuozáhagaid, maid earát eai leat fuobmán govvet! Ovdal govvekeahtes čuozáhagat leat merkejuvvon gilvvu kártái rukses ivnniin.
Vurke gilvui oassálasti govaid 1.–30.9.2022 govvabáŋku Wikimedia Commonsii, gos dat leat buohkaid friddja geavaheamis. Sáhtát oassálastit iežat govven govaiguin, mat leat govvejuvvon jagi 2022 áiggi dahje ovdal.
Erenoamážit gánneha fuomášit:
1. Dronagovvemis leat iežas njuolggadusat, nu ahte amma muittát váldit vuhtii dasa laktáseaddji virgeoapmahašrávvagiid.
2. Muitte gudnejahttit priváhttavuođa. Juos háliidat govvet priváhtta guovllus, bivdde govvemii eananoamasteaddji lobi. Go govain oidnojit olbmot, sihkkarastte, ahte oaččot govvejuvvon olbmuin miehtama gova almmustahttimii.
Gilvvu lágida Wikimedia Suomi rs, ovttasbargoguoibmin Museavirgedoaimmahat, Kerava museabálvalusat, Tuusula musea, Hyvinkää gávpotmusea, Riihimäki gávpotmusea, Nurmijärvi musea, Lapua gávpoga museat ja Eurohpá kulturbirasbeaivvit. Gilvu lágiduvvo Suomas jo guđat geardde. Ulbmilin lea movttiidahttit mielde nu viiddes olmmošjoavkku go vejolaš ja dahkat kulturárbbi oinnolažžan ja dovddusin.
